Kalibo Aklan ——Ginpadumdum it mga otoridad sa publiko nga ro barangay quarantine pass hay indi pwedeng magamit sa quarantine checkpoints pasueod sa banwa it Kalibo.
Raya hay matapos nga uman nga nag-instrikto sa pag-inspection nga nagresulta sa mahaba nga pila it mga saeakyan partikular sa Kalibo-Numancia bridge ag Barangay Tigayon National Highway .
Suno sa sangka checkpoint frontliner nga nataeupangdan nanda nga matapos nga ipapanaog sa General Community Quarantine halin sa ECQ ro aklan hay bumuhos ro mga tawo ag saeakyan sa mga karsadahon it Kalibo .
Ginklaru dugang nga ro barangay quarantine passes hay pwede eamang nga magamit sa barangay quarantine checkpoints.
Kapareho it patakaran sa idaeum it ECQ, kinahangean sigon nga magbo-oe it clearance halin sa natungdan nga Mayor ro sangka indibidwal kon naga-agto sa banwa it Kalibo agud nga masayuran kon ano ro anang partikular nga panaw ukon purpose.
Ro ginapasugtan eamang nga maka-agi sa quarantine checkpoints hay ro mga empleyado nga may valid IDs .
Ro mga naga-eabag ukon bukon it otorisado hay ginapabalik ag kon nagapilit hay ginatiketan.
Gindugang pa nga ro mga indibidwal nga may valid appointments sa mga hospitals ukon klinika hay dapat nga magpakita it pruweba it andang pagpa-check-up ukon pagbisita .
Samtang, ginpahayag man ni Engr Marlon Velez, hepe it Land Transportation Office (LTO-Aklan) nga nagakabulig sanda sa kapulisan ag Highway Patrol Group (HPG) sa pagbantay sa quarantine checkpoints agud nga masiguro nga ginasunod ro social distancing sa sueod it mga saeakyan .
Kaibahan it LTO personnel ro mga gin-hire it Provincial Government nga iga-deploy kunta bilang mga Aklan Traffic Discipline Zone Enforcer.
Ginapalusot sigon nanda ro mga rehistro ag lisensiya nga nag-expire ko tiempo nga ginapatuman ro ECQ sa Aklan.
