KALIBO, Aklan—Nagpatigayun it maeapnagon nga Caravan ro Bagong Alyansang Makabayan ukon Bayan-Aklan kaibahan ro nagkaeain-eain nga sector agud ipaabot ro andang pagpamaeabag sa pagpatindog it casino sa isla it Boracay ag pagduso it Boracay Island Development Authority (BIDA) Bill sa idaeom it Government-owned and controlled corporation (GOCC).
Ginpahayag ni Mr. Kim Sin Tugna it Bayan-Aklan, apisar nga nakaangkon it delay ag pagharang kanda sa boundary it Nabas-Caticlan hay owa man kara napunggan ro andang katuyuan nga magpaabot it pag-oponer sa nasambit nga proposisyon.
Nasayuran nga aprubado eon sa ikatlo ag ulihing pagbasa it manabang kapueongan it kongreso ro BIDA Bill.
Pamatuod eamang sigon raya nga seryoso ag pursigido ro administrasyon ni Pangueong Rodrigo Duterte nga mabuoe ro pagdumaea sa bantog nga isla.
Bangud kara, nagakabaeaka sigon sanda nga posibleng magresulta raya it anti-social activity kapareho it prostitusyon, illegal nga droga ag kriminalidad.
Nagaeaum man ro andang grupo nga mapatian it Senado ro apela it nagkaeain-eain nga sector ag lokal nga gobyerno sa Aklan nga naga-kontra sa BIDA-GOCC.
