KALIBO, Aklan—Ginaimbestigahan eon makaron it Bureau of Fire Protection ukon BFP Kalibo ro pagkasunog it sangka stall sa sueod mismo it Kalibo Public Market.
Una kara, nakabaton it tawag ro BFP kon siin may nagakasunog nga stall sa merkado publiko rason nga insigida sandang nagresponde ag naabutan ro madamoe nga aso nga halin sa nakasarado nga stall nga may baligya nga assorted items.
Suno kay FO1 John Rey Magno it BFP-Kalibo, raya hay ginapanag-iyahan it mag-asawang Shirley ag Bernard Lazo nga residente it Brgy. Mobo, Kalibo.
Suno kana, pagkabaton it impormasyon halin sa security guard it tindahan hay gilayon sanda nga nagresponde sa lugar ag dikara naberipika nga halin sa tunga it stall nag-umpisa ro kaeayo.
Samtang sa pihak nga parte, eubus man ro pagkanugon it mag-asawa matapos nga haeos tanan it andang baligya hay nagkaeasunog ag nagkaeabasa bangud sa pagbuga it tubi it BFP para gilayon nga maapula ro kaeayo ag base may masalbar pa ro mga raya nga baligya.
Gin-ako it mag-asawa nga may nakasaksak nga freezer ag CCTV antes nanda gin-aywanan ro pwesto ag paealigban pa makaron kon anu ro gintunaan it insidente.
