KALIBO, Aklan—Uman nga nakipag-angot ro pamunuan it Bureau of Jail Management and Penology (BJMP)-Aklan kay Governor Florencio Miraflores agud nga maeakip ro mga inmates partikular ro mga senior citizens ag may comorbities sa andang target nga maging recipient it bakuna kontra COVID-19.
Suno kay Jail Inspector Joel Laquihon it BJMP-Aklan nga nagasalig eamang sanda sa lokal nga gobyerno sa availability it supply halin sa Department of Health.
Kapin sa 23 eon suno kana nga personnel it BJMP ro naturukan it bakuna ag sambilog eon lang ro owa pa.
Apang sa kabilugan nanda nga presu ukon persons deprived of liberty (PDL) hay owa pa it maskin sambilog nga may nabakunahan.
Sa pihak nga parte, gindugang pa ni Jail Inspector Laquihon nga nagapabilin nga bawae ro mga bisita sa andang pasilidad, apang ginapasugtan nanda ro mga ginapadaea nga mga pagkaon, kwarta, bueong ag iba pang kinahangeanon para sa mga inmates kada lunes, miyerkules ag biyernes.
May uman sigon sanda nga programa nga e-dalaw ag e-tawag ukon ‘video calling” agud nga maka-istorya it mga PDL ro andang mga mahae sa kabuhi.
Samtang, hugut sigon nga ginapatuman ro health and safety protocols sa pasilidad agud nga malikawan nga makasueod ro deadly virus.
