KALIBO, Aklan — Nagdaog it limang tropeo ro Boracay All Stars sa bag-o eamang natapos nga Iloilo Dragon Boat Regatta 2024 competition ko Agosto 23 hasta 24.
Kampeon ro grupo sa Open Mixed Standard “Highlight Category” nga ginaeakipan it waeo nga seniors ag 12 nga “under 18” paddlers kamana man sa Under 18 Mixed.
First runner up mat’a sanda sa under 18 Boys Small Boat ag Open Women Small Boat nga ginaeakipan it ap-at nga seniors ag an-um nga under 18 paddlers.
Sa Open Men Small Boat hay gindeklara nga 2nd runner-up ro grupo.
Sa pihak nga parte, ginpahayag it Boracay All Stars nga nagsirbi nga inspirasyon it andang mga paddlers ro pagbueuligan it kada isaea kamana man ro andang hard work sa training, dedikasyon ag fighting spirit.
Nasayuran nga ro pinakabata sa andang grupo hay naga-edad eamang it 14.
Mag-eowas sa pagsabak sa mga kompetisyon sa nasyon, nakapasakop eon man ro grupo sa dragon boat competition sa ibang mga nasyon kapareho it Taiwan, Malaysia, Korea, Hong Kong ag iba pa.
Sa kamatuoran suno kanda nga sa buean it Nobyembre hay uman sanda nga magapasakop sa kompetisyon sa Korea.
Nabilog ro grupo ko 2007 nga gin-umpisahan it pila sa mga original members it Boracay Dragon Boat team nga nagtau man it dungog bukon eamang sa Boracay kundi sa bilog nga nasyon bangud sa paghakot it mga medalya ag tropeo.
