KALIBO, Aklan—Ginpamalibaran it barangay council it Estancia, Kalibo ro alegasyon nga owa sanda it may ginahimo nga aksyon sa mga reklamo nga ginapaabot it andang mga constituents.
Suno kay kagawad Arnel Marcelino it Estancia, Kalibo nga ro sin-o man nga naga-kwestiyon sa andang trabaho hay direktang mag agto kana ag kay punong barangay Daisy Andrade agud nga maklaruhan.
Ginhalimbawa nana ro reklamo it sangka foreigner nga nagpatindog it dormitoryo sa Melgar road sa nasambit nga lugar nga insigida sanda nga nagpatigayon it inspection kaibahan ro kalibo PNP ag zoning ag sanitation department it LGU-Kalibo agud nga mausisa kon nuisance gid man ukon disturbo sa anang negosyo ro mga alagang manok nga pangbueang it pilang residente ag ro ginpatindog nga basketball court maeapit sa anang building.
Samtang, nakipag angot eon man suno kana sanda sa Akelco para sa gina-request nga street light.
Kadungan kara, nag apela imaw sa pilang radio commentator nga taw-an anay sanda it kahigayunan nga makapaathag antes nga banatan sa ere.
Sa pihak nga parte, ginpahayag man ni Reynold Florentino, barangay electrician nga ro ginareklamo nga madueum nga lugar hay sakop it Capitol Site, Kalibo.
Naga-aeang-aeang man sigon sanda nga magbutang it bombilya sa pagkabaeaka nga makasuhan it illegal tapping it Akelco.
Gusto suno kana it kooperatiba nga boe-on eon ro mga individual nga mga street lights nga owa it nagakaigo nga kontador.
Samtang, ginpahayag ni certain Marlon, sangka residente sa lugar nga nagpaathag eon kanda ro barangay council kon ham-an nga indi pa mabutangan it street light sa andang lugar.
Bangud kara, nagboluntaryo eon lang sigon ro mga residente nga magbutang it kanya-kanya nga iwag sa guwa it andang natungdan nga lugar nga ginapatinti sa gabi-i.
