Generally peaceful ro bag-o eamang natapos nga Barangay ag Sangguniang Kabataan Elections 2023 sa banwa it Kalibo, mag-eowas eamang sa mga aberya sa kuryente ag gina alegar nga vote buying.
Suno kay Atty. Christian Itulid, Election Officer IV it COMELEC Kalibo nga pagkatapos it hueuyapan hay ginproklama man eagi ro mga nagdaog, mag-eowas sa mga nag-tie nga mga kandidato nga kinahang-ean pa i-schedule ro pagbreak it tie pinaagi sa pagdraw lots nga nakabase sa Omnibus Election Code.
Dugang pa ni Atty. Itulid nga mga ranking eamang raya ag kaeabanan hay sa mga Sangguniang Kabataan.
Dugang pa nga insigida man nga narespondehan it AKELCO ro insidente it pagkaduea it kuryente.
Sa pihak nga parte, nataeupangdan ro pag angkon it mga double registration imbis nga transfer of registration rason nga otomatiko nga na-delete sanda sa listahan ag owa nakaboto.
Nakastandby man ro mga assistance desk ku adlaw it eleksyon para maayos ro mga aberya.
Ginklaru pa ni Atty. Itulid nga kung saea ro spelling pero sounds like hay huyap raya sa sangka kandidato, kamana man sa mga hayo ag nakabutang sa pagfile it Certificate of Candidacy.
Ginpasiguro nana nga sa makaron ro mga ballot boxes hay gindaea sa Office of the Municipal Treasurer ag ro nasambit nga opisina ro responsable sa mga balota.
Padayon pa ro encoding halin sa local office, pero ginatan-aw nga mataas man ro naging voter’s turnout.
Padumdom man sa mga kandidato daog man ukon pirde nga within 30 days pagkatapos it election hay magsumitir it SOCE ukon Statement of Contribution and Expenditure.
Kon mapas-eawan nga makapasa kara hay indi eun pwedeng magsakar sa masunod nga eleksyon.
Samtang, nabayaran eon sigon ro haeos 373 nga mga manugturo, 17 nga DepEd Supervisors, 16 sa mga support staffs ag iba pa nga nagserbisyo ku eleksyon.
Paathag pa nana nga pagkatapos maproklama hay sa bahin euta it DILG kung hin-uno mapungko ro mga nagdaog.
