KALIBO, Aklan—Ginreklamo it pilang residente it Barangay Bulwang, Numancia ro gina-alegar nga bukon it patas ag kawad-an it nagakaigo nga koordinasyon sa pagpanupod it ayuda para sa mga naging biktima it maeapnagon nga pagbaha tuga it bagyong Paeng.
Suno kay Mrs. Carmen Escalona, residente it nasambit nga barangay nga eampas tawo ro baha sa andang lugar apang nagakangawa kon ham-an nga owa naeakip ro andang pangaean sa mga nakabaton it ayuda.
Kon owa pa sigon sanda nagpasimpalad nga mag-agto sa andang barangay hall hay owa pa sanda nakabaton it relief goods.
Mag-eowas kara, owa man sanda nakaibahan sa unang batch nga nakabaton it cash assistance nga nagabalor it P3,000 pesos.
Makabig suno kana nga unfair ro natabu bangud nga base sa mga nabaton nga impormasyon, kon sin-o pa ro bukon it masyadong apektado hay sanda pa ro unang nakabaton it bulig pinansiyal.
Ginpamalibaran man nana nga owa it sin-o man nga taga-barangay ukon maskin ro in-charge nga barangay health worker ukon BHW sa andang lugar nga naglista it mga naging biktima it nag-agi nga kalamidad.
Mabahoe ro andang pagpati nga ginapili eang ro ginataw-an it ayuda sa andang barangay.
