KALIBO, Aklan—Gina-umpisahan eon ro pagtukod sa unang 11 nga paeuparan it Civil Aviation Authority of the Philippines (CAAP) it gender-neutral restrooms bilang tikang sa gender development awareness ag pagtau it proteksyon sa kinamatarung it mga myembro it LGBTQ+ community.
Suno kay CAAP-Aklan manager Engr. Eusebio Monserate Jr., ro nasambit nga ideya hay nabilog kasunod sa diskriminasyon nga naexperiensiyahan it mga raya sa komunidad.
May una nga proposal man sigon ro CAAP-Aklan agud nga maeakip sa unang mga paeuparan nga pagabutangan it comfort room para sa LGBTQ.
Mabahoe sigon ro gintaeana nga pondo it ahensya para sa Gender Awareness Development projects sandig sa Republic Act 9710 ukon ro Magna Carta of Women ag Executive Order 273 ukon mas kilaea bilang Philippine Plan for Gender-Responsive Development.
Nasayuran nga nag-ugat ro isyu sa LGBTQ+ community matapos nga ginkaladkad it janitress it sangka mall sa Quezon City paguwa sa pambabayeng comfort room ro transgender nga si Gretchen Diez.
