KALIBO, Aklan–Ginpaidaeum eon sa state of calamity ro banwa it Caluya sa probinsiya it Antique matapos maapektuhan it oil spill halin sa eumugdang nga motor tanker nga MT Princess Empress.
Suno kay Kier Domingo, Public Relations Officer II it LGU-Caluya, ro Barangay Semirara ag pilang sitio sa Barangay Sibulo ro eubus nga naapektuhan it oil spill rason nga ginsuspinde eon ro pagpangisba at pag-agto it mga turista eabi eon tourist destination nga Liwagaw Island nga sangka white beach man.
Samtang, kapin sa 569 eon nga pamilya ro apektado sa nasambit nga mga lugar nga ginpanupuran eon it relief goods it gobyermo.
Sa pihak nga parte, nagabueuligan makaron ro tanan nga mga barangay sa Semirara Island kaibahan ro Semirara Mining Power Corporation ag Barangay Sibulo, kun sa siin nagbilog ro mga raya it emergency response team para sa ginapatigayon nga coastal clean-up gamit ro improvised oil spill boom.
Ginakabaeak-an man makaron it Municipal Agriculturist Office it lokal nga gobyerno it Caluya nga maapektuhan pati ro andang seaweeds industry.
Ginatantiya nga naga abot eon sa P3,000,035 ro kahalitan nga gintuga it oil spill sa nasambit nga lugar.
Nasayuran nga ro Princess Empress hay may sakay nga 800,000 liters it industrial fuel oil kat raya hay nag-eugdang.
