Ginaimbestigahan eon it Presidential Anti-Organized Crime Commission (PAOCC) ro mga balita angot sa mga Chinese national nga nagbakae it mga eogta sa Central Luzon.
Ginsugid ni PAOCC chief Gilbert Cruz nga nakabaton sanda impormasyon nga pilang ka Chinese nationals ro nagarenta o nagbakae it mga property ag nagabayad pa it hasta P90,000 kada ektarya sa mga bukiron.
Paathag it opisyal nga sa imbis nga magtanom ro mga mangunguma, ginbayaran eon eamang sanda it mga Chinese ag ginrentahan ro mga eogta ag ro mga Chinese eon ro bahala kung ano ro anda nga gustong himuon sa mga eogta.
Pamilit it PAOCC official nga kinahang ean raya nga maimbestigahan bangod nagapakita raya it posible nga mga problema sa paeaabuton kapin eon sa pag-kontrol sa mga lokal nga umahan.
Ro mismong rebelasyon it PAOCC official hay sa tunga it ginpakusog nga nationwide crackdown it POGO hubs sa nasyon kung siin mga dumueo ro kasagaran nga kaibahan partikular eon ro mga Chinese nga nadadawit sa mga ilegal nga aktibidad kaparehas it human trafficking.
