KALIBO, Aklan—Hugot nga ginabawae ro bueo-bueo ukon cockfighting ag iba pang klase it sugae sa tunga it coronavirus disease 2019 (COVID-19) pandemic.
Suno kay P/Staff Sgt. Jane Vega, tagapaghambae it Aklan Police Provincial Office ukon APPO nga raya hay kasunod it sunod-sunod nga pagka-aresto sa mga indibidwal nga nagapatigayon it bueo-bueo sa nagkaeain-eain nga banwa sa Aklan.
Kaabuan sigon sa mga raya hay gina-warningan bilang konsiderasyon bangud sa ginapangatubang nga pandemya.
Mag-eowas sa cockfighting, bawae man suno kana ro mahjong, tong-its ag iba pang klase it sugae.
Kaeabanan sigon nga gina rason it mga nadakpan hay pampalipas oras ro andang paghampang.
Gindugang pa ni Vega nga nagapabilin nga mabakod ro posisyon it Inter-Agency Task Force on Emerging Infectious Diseases nga bawae ro mga makarondaya nga aktibidad bangud kaeabanan nga gina-eabag kara ro physical distancing bangud sa nagatumpok-tumpok nga mga tawo ag owa nagasuksok it face mask.
Hugot sigon ro monitoring it kapulisan sa bilog nga probinsiya agud nga masiguro nga owa it naga-eabag sa nasambit nga mandu.
