BALITANG Espesyal — May sangka bag-ong bukas nga coffee shop sa Tokyo, Japan nga mga writers eamang ro customers nga ginapasueod .
Sa unang tan-aw hay medyu may diskriminasyon sa nasambit nga coffee shop, apang bukon it celebrity, manggaranon ukon maimpluwensyang tawo ro puwedeng makasueod kara kundi mga manunueat ukon writers nga may gina-eagas nga deadline!
Makit-an ro Genko Shippitsu Café ukon Manuscript Writing Café sa Koenji district it Tokyo ag ginpatindog raya para sa mga writers nga gustong makatapos it andang ginasueat ag maka-eagas sa andang deadline.
Antes nga mataw-an it lamesa sa café, kinahangean nga hambaean ro attending staff it kun anong project ro kinahangean nga tapuson it customer.
Pwede raya nga nobela, script, magazine article ukon kun ano man nga may kaangtanan sa pagsueat.
Kinahangean man nga ideklara kon pilang pahina ukon pages ro kinahangean nga matapos nga trabaho.
Raya hay bangud nga may staff nga magakamusta sa customer kada oras kon ano ro progress sa ginatapos nga proyekto.
Suno sa tag-ana it café nga si Takuya Kawai, ginpatindog nana ro Manuscript Café para sa mga manunueat nga naga-usoy it lugar nga may mga tawong makatau it motivation nga tapuson ro andang writing project.
Nagabalor it 150 Yen ukon katumbas it P62.00 pesos kada 30 minutos ro pagpabilin sa Manuscript Café.
Simple eamang ro andang menu bangud nga kape ag tubi eamang ro pwedeng ma-order kara.
Ginapasugtan it management ro mga customers nga magdaea it kaugalingon nanda nga pagkaon ukon magpa-deliver halin sa ibang restaurant.
