KALIBO, Aklan—Masobra sa 750 nga mga nagparehistro nga botante sa banwa it Kalibo ro gin-aprubahan it Commission on Elections ukon Comelec sa ginpatigayon nga Election Registration Board ukon ERB hearing ko Abril 15.
Raya ro ginpahayag ni Comelec election officer IV Atty. Christian Itulid it Comelec Kalibo.
Raya hay angot sa nagapadayun nga pagparehistro para makaboto sa May 2025 National and Local Elections.
Nagapadayun sigon ro andang paglibot sa mga kabarangayan para sa satellite registration kanman man nga nagabaton it gustong magpalista sa idaeum it Register Anywhere Program.
Kaeabanan suno kana nga naga-agto sa andang taeatapan hay ro mga naga-apply para sa pag- transfer it andang residence sa ibang barangay ag banwa kamana man ro new registration.
Ginpahayag dugang nga kada adlaw hay naga-average sanda it 10 to 15 nga applicants samtang sa mga ginakasa nga satellite registration hay naga-abot sa 80 to 100.
Padumdum nana nga indi paghueaton ro last minute registration agud nga malikawan ro pagginutok ag magpila it mabuhay.
Panawagan pa it Comelec Kalibo nga taw-an it oras ro pag-agto sa andang taeatapan ag magpasakop sa andang mga satellite registration sa mga kabarangayan .
Ro voter registration hay gin-umpisahan ko Pebrero 12 ag nakataeanang magatapos sa Setyembre 30.
