KALIBO, Aklan — Uman nga magapatigayon it site inspection ro Committee on Infrastructure it Sangguniang Bayan it Kalibo may kaangtanan sa indi matapos-tapos nga konstruksyon it bag-ong Kalibo Public Market.
Suno kay SB member Ronald Marte, miyembro it nasambit nga komitiba nga tuyo it panibag-ong inspeksyon nga personal nga mausisa ro presenteng estado it proyekto, kaibahan ro progreso it konstruksyon ag ro kaeowasan it estruktura.
Raya hay kasunod it naunang mga pagbisita it konseho kun sa siin may pilang parte it building ro gintumod nga nagakinahangean it revision ukon pag-ayos.
Dugang pa kara nga sa masunod nga session sa Martes nga adlaw hay gin imbitahan nanda ro pilang vendors agud nga maipaabot ro update it proyekto.
Nauna eon nga napabalita nga owa pa eubusan nga natapos ro proyekto ag kapin sa 90 porsyento pa eamang ro completion kara sa nagtaliwan nga assessment it mga natungdan nga opisina.
Maabung beses eon nga nakaangkon it pagpa-isoe it completion it proyekto umpisa ko Disyembre 2025 kun sa siin ginasugid nga matapos eon man raya sa Hunyo 15 .
Samtang, ginkumpirma man ni SB Marte nga matapos ro site inspection sa Kalibo public market hay magaderetso sanda sa sambilog pang kontrobersiyal nga proyekto nga Memorial Park and Crematorium sa Brgy. Mabilo, Kalibo.
Raya hay kasunod it alegasyon nga naubos eon ro gintaeana kara nga P65 milyon nga pondo nga gin-loan sa Veterans Bank apang ro natapos pa eamang hay ro façade ag ro crematorium.
