Ginbatikos ni Davao City 1st District Representative Paolo Duterte ro pahayag ni Atty. Lorna Kapunan, abogado it prosecution sa impeachment trial, nga may kontribusyon sigon ro pamilya Duterte sa kultura it kinagamo sa Pilipinas.
Suno kay Kapunan, kaibahan sigon sa ginatumod nga problema ro mga alegasyon it pagpamaeag ni Vice President Sara Duterte kay Pangueong Ferdinand Marcos Jr., ag mga alegasyon it extrajudicial killings ko administrasyon ni dating Pangueong Rodrigo Duterte.
Ginpahayag man it abogado nga posibleng nakadugang sa problema ro mahinay nga sistema it hustisya ag kakueangan sa values education.
Bilang sabat, gin-engganyo ni Cong. Duterte si Kapunan nga indi paggamiton ro insidente it pagpamaril sa Ateneo de Zamboanga City bilang kaparte it gina-alegar nga anti-Duterte nga kampanya sa impeachment.
Ginpamilit pa nana nga ro insidente hay sangka krimen nga dapat imbestigahan ag pasabton ro mga responsable, ag indi dapat obrahon nga kaparte it impeachment propaganda.
Nagpanawagan man si Duterte sa prosecution nga magplastar it konkretong ebidensya agud mapamatud-an ro andang mga alegasyon sa impeachment trial.
Samtang, angot sa panawagan it Akbayan Partylist nga mag-atubang si Vice President Sara Duterte sa impeachment trial agud nga mapadasig ro pagbista, ginpahayag it kongresista nga indi kinahangean nga magtambong mismo ro bise presidente.
Suno kay Duterte, pwedeng mag-representar kana ro anang mga abogado agud nga mapadayun ro proseso it pagbista.
