KALIBO, Aklan–Ginkasubo ni Aklan 2nd District Congressman Teodorico Haresco ro naging tikang it anang lokal nga partidong Tibyog-Akean nga pagdeklara bilang “persona non grata” sa ap-at ka mga kongresista nga nagdihon it House bill 1085 ukon uman nga pagduso it BIDA bill sa idaeom it GOCC.
Dapat sigon nga ginpag-isipan anay it mayad antes ro pagduso it nasambit nga resolution.
Sa ginpatigayun nga media conference, ginpaathag ni Congressman Ted nga owa nagtao it abiso ukon kortesiya kanda ro anang lokal nga partido antes ginpasa ro resolution.
Agosto 3 kat opisyal nga gin-withdraw nanday Luis Raymund “Lray” Villafuerte it 2nd District it Camarines Sur, Tsuyoshi Anthony Horibata it 1st District it Camarines Sur, Miguel Luis Villafuerte it 5th District it Camarines Sur ag Nicolas Enciso lll it Bicol Saro Party-list.
Angot kara, insigida man nga nagpatigayun it special session ro provincial board members agud nga bawion ro deklarasyon kontra sa ap-at nga kongresista.
Nauna eon nga ginpaathag it pilang miyembro it Sangguniang Panlalawigan nga owa eagi nanda nabaton ro sueat nga ginabawi eon it nasambit nga mga kongresista ro andang kontrobersiyal nga proposisyon.
Nasayuran nga tuyo it House Bill 1085 ukon Proposing the Creation of Boracay Island Development Authority (BIDA) as a Government-Owned and Controlled Corporation (GOCC) ko Hulyo 4, 2022 nga ro national government eon ro magapadaeagan sa operasyon it isla it Boracay.
