Ginpabutyag ni Ervin Dela Cruz ro anang pagpasaeamat ag apresasyon sa New Washington Municipal Police Station pinaagi sa pagrap kung siin nga mismong nasambit nga taeatapan man ro nag-upload.
Suno kay Ervin nga nahimo nana ro rap song bangud gusto nana ipaabot sa tanan nga bukon it madali ro ginahimo it sangka pulis.
Pahayag pa nana nga bilang sangka rapper hay maabo man ro mga hangkat nga anang ginpangatubang kapareho it mga bashers ag kapirdehan pero para kana gintan-aw nana ruyon bilang paagi agud nga mas mayad pa imaw sa patag nga anang ginakahiligan.
Panugiron man nana nga naging inspirasyon gid nana ro anang magueang nga imaw man ro nagtueod ag nagsuporta kana nga magsueod sa nasambit nga patag kung siin nga suportado imaw ku anang pamilya ag mga amigo.
Sa makaron hay maabo ro mga suporta, pagpadungog ag pagpasaeamat nga nababaton ni Dela Cruz bangud sa anang ginhimo.
Uwa man sigon anay imaw naga-upload sa mga Facebook ukon Youtube ku anang mga videos bagud nga medyo hassle para kana bilang sangka estudyante ro pag-intra anay sa makaron nga butang pero panigurado nana nga ro anang hilig ag interes sa rap hay buhi gihapon bisan nga masako sa pagiging estudyante.
Masayuran nga si Ervin Dela Cruz hay sangka criminology student sa sangka unibersidad sa banwa it New Washington kung siin ngani nga idto man imaw nagaduty sa Municipal Police Station ku banwa nga naging anang inspirasyon.
