KALIBO, Aklan—Nagpaguwa it pilang padumdum ro Civil Service Commission sa mga examinee sa nakataeanang Career Service Examination-Pen and Paper Test sa maabot nga domingo, Agosto 20.
Suno kay Leo Jamorin, director II it CSC-Aklan nga makaron nga nakapaskil eon sa Online Notice of School Assignment ro testing venue ukon school assignment hay mas mayad kun mabisitahan raya it mga examinees sang adlaw antes ro eksaminasyon agud nga maging familiar sa direksyon ag travel time.
Sa adlaw sigon it eksaminasyon, dapat nga maging temprano sa pag agto sa testing venue ro examinee bangud nga magasarado raya it 7:45 it agahon.
Igapatuman man ro “No ID Card/documents, No Exam” policy kun sa siin gina engganyo ro mga examinee nga magpresentar it valid ID card.
Samtang, maskin nga optional eon ro pagsuksok it face masks, ginalaygayan ro examinees nga magdaea gihapon it face masks eabi eon ro mga may edad eon, individuals with comorbidities, immunocompromised, nabdos, unvaccinated ag symptomatic individuals.
Ginaboebanta nga masobra sa 3,000 nga mga examinees ro magapadueong sa limang ka mga eskwelahan nga gintaeana nga testing center nga magabo-oe it professional ag sub-professional levels.
Ro nasambit nga mga eskwelahan hay ginaeakipan it Kalibo Pilot Elementary School, Kalibo Elementary School, Kalibo Integrated Special Education Center, New Buswang Elementary School ag Aklan National High School for Arts and Trade.
Dugang pa nga magsuksok it proper attire ag likawan ro mga sleeveless, shorts, tsinelas ag iba pa.
Bawae man ro pagdaea it mga cellphone, calculator, ag magselfie ag pagpaguwa it test booklet.
