Kalibo, Aklan-Nag-abot sa kapin sa P320,000 ro naging kahalitan it sunog nga nagtuhaw sa bodega it sangka fast food chain sa main road sa Brgy. Balabag sa isla it Boracay, bandang alas-8:42 it agahon it huwebes, Agusto 8.
Suno kay F01 John Lord Diaz, arson investigator it Bureau of Fire Protection ukon BFP Boracay nga na-abo ro pilang portion it istraktura nga nahamtang sa rooftop it establisimento.
Insigida sigon nanda nga narespondehan ro fire call bandang alas-8:47 it agahon rason nga owa eon nagkalhit ro kaeayo . Fire out eon kat mag-abot sanda sa lugar bandang alas-8:51 it agahon matapos nga magbayanihan ro mga staff it nasambit nga fast food chain.
Ginasugid nga sangka guwardiya it nasambit nga kaean-an ro nakapan-o sa sunog nga insigidang nagpangayo it bulig sa mga empleyado kara ag dayun nga nagtawag it bumbero.
Owa man it naninahan sa insidente ag owa it customer nga naapektuhan. Padayun pa nga ginatumod ro rason it nasambit nga sunog.
