KALIBO, Aklan—Temporaryong nakahilway matapos nga nakapiyansa sa ginapangatubang nga kasong Slight Physical Injury ro hepe it Balete Auxiliary Police nga imaw ro nagpanueop sa dating media man sa guwa it covered court it Barangay Cortes sa banwa it Balete ko adlaw it Lunes, Hunyo 28.
Suno kay P/Capt. Rajiv Salvino, hepe it Balete PNP nga natabo ro insidente samtang una sigon sa guwa it court it nasambitan nga lugar ro biktimang si Arbbelle Zausa , 36 anyos ag residente it Sito Libtong, Barangay Estancia, Kalibo kaibahan ro anang igkampod nga si Mrs. Therisita Mateo.
Nag-abot man sigon ro suspek nga si Romar Roberto , chief it Balete Auxiliary Police , 56 anyos ag residente it Barangay Arcangel Balete kung sa siin gilayon man nga gikamusta it biktima.
Sa owa man nasayuran nga rason hay gintueop it suspek ro nasambitan nga biktima nga tinamaa sa anang dughan ag sa waea nga doeonggan.
Base sa imbestigasyon, may ginatago nga kaugot ro suspek sa biktima bangud dati eun rayang ginreklamo sa radyo ko dag-on 2020 kung sa siin ro dating media man ro nagdaea it nasambitan nga isyu.
