KALIBO, Aklan—Ginbulgar it sangka dating Philippine Port Authority ukon PPA police ro kalakaran sa pantalan kon sa siin ginapangunahan it Bureau of Customs ukon BOC ro pagpasueod it mga ginakabig nga smuggled items.
Suno kana, sa 18-anyos nana nga pagtrabaho sa uwa eon ginhingaeanan nga pantalan kamana man ginpakamayad nana nga inde eon imaw paghingaeanan nga mismong ro BOC ro nagahimo it pamaagi para mapasueod ro mga ginakabig nga hot items.
Raya hay ginakaeakipan it mga luxury cars, bags ag maabong iba pa kon sa siin sa gabi-e ginahimo ro pagbaylo it mga items nga nakasueod pa sa mga shipping container.
Sa pag-inspection kara it mga commissioner ag inspector hay ibang items ukon goods eon ro nakabutang sa container nga posibleng makalusot eon paguwa sa pantalan ag haom para sa delivery.
Suno pa kana, “katunga obligasyon, katunga bayolasyon” nga ro buot hambaeon hay kon may ginapguwa ro BOC ginaistoryahan eamang nanda raya agud nga makaguwa man sa PPA, Philippine Coastguard ag Maritime Police.
Ginpahayag dugang nga maabong diskarte ro nagakinatabo sa pantalan ag tanan nga maagyan it smuggled items hay ginabayaran kon sa siin tanan hay makasamit sa grasya.
Raya sigon ro nagtueod kana kon ham-an it naghalin imaw sa nasambit nga linya it trabaho ag nag-apply sa ibang kumpanya.
