KALIBO, Aklan—Nag-alsa balutan eon ro daywa sa tatlong suspek nga nagbuno-patay sa sangka tricycle driver ko sabado it gabi-i, Nobyembre 27 sa Barangay Camanci Norte, Numancia.
Raya ro ginpahayag it 20-anyos nga naarestong suspek nga si alyas Jay-ar, sangka construction worker ag residente it Imus, Cavite ag haeos daywang domingo pa eamang nga naga-istar sa baeay it anang tiya sa barangay bulwang, numancia.
Kasunod kara, nagpanawagan imaw sa anang mga kaibahan nga magsurender eon ag atubangon ro kaso sa brutal nga pagpatay sa biktimang si Wilfredo Peralta Tamayo, Jr., 39 anyos tumandok it Barangay Mangan, Banga, apang temporaryongh naga istar sa Purok 4, C. Laserna, Kalibo.
Si alyas jay ar hay nauna eon nga naaresto it kapulisan ko adlaw it Lunes.
Suno kana nga owa imaw nakabuno sa biktima sa baylo hay ginturo kara ro anang mga kaibahan nga sanday alyas regie ag joker nga indi eon makit-an ro andang presensiya.
Samtang, ginsaysay nana nga ko Sabado it gabi-i hay ginparahan nanda ro tricycle it biktima halin sa bulwang ag nagpahatud sa Barangay Camanci Norte agud nga magbo-oe it kaeabasa.
Apang kat ginsukot sigon sanda it bayad it driver hay gulping nagbo-oe it kutsilyo ro sambilog sa mga suspek ag ginbuno si tamayo sa anang tiyan.
Nakadaeagan pa sigon raya apang gin-eagas it mga suspek ag ginbuno it uman it makapilang beses nga nagresulta sa anang kamatayon.
Aminado si alyas jay ar nga naka inom sanda kat mahimo ro krimen.
Haeos sang buean pa eamang sigon sanda nga magkakilaea nga tatlo sa inuman.
Gindugang pa kara nga nakursunadahan eamang nanda si Tamayo.
Kasumod kara ginabandona sigon nanda ro tricycle sa Sitio Pigado sa Brgy. Bakhaw Sur, Kalibo maeapit sa dump site agud nga mapataeang ro imbisyigasyon.
Sa bulig it CCTV foootages hay natumod ag nakilaea ro mga suspek nga makaron hay nagapabilin nga at-large.
