KALIBO, Aklan—Presenteng ginabueong sa ospital ro daywang ka mga kaeaeakin-an matapos nga mabun-an sa Brgy. Napti, Batan.
Nakilaea ro mga biktima nga sanday Patrick Abella, 22-anyos, residente it Brgy. Pobalcion sa nasambit nga banwa ag Jonie Flores, 22-anyos samtang ro suspek hay nakilaea nga si Cesar Salvador, 23-anyos, residente it nasambit nga lugar.
Base sa report, magkaibahan sa sangka namatyan ro tatlo kat makaangkon sanda it diskusyon.
Sa owa magbuhay hay nag-uli sigon ro suspek kung siin ginsundan man raya nanday Abella ag Flores para bakueon.
Agud madepensahan ro kaugalingon, gumabot si Salvador it siyaw ag ginbuno ro daywa.
Nakaangkon it sangka tama it pagbuno sa likod nga porsyon si Flores samtang nalastruhan man sa dughan ag waea nga butkon si Abella.
Ro daywa hay gilayon nga gindaea sa ospital para sa nagakaigo nga pagbueong samtang ro suspek hay una sa kostudiya it Batan Municipal Police Station para sa nagakaigo nga disposisyon.
