KALIBO, Aklan — Full force nga nagtambong ro delegasyon it Western Visayas sa opening ceremony it 2024 Palarong Pambansa sa Cebu City nga magatapos hasta sa Hulyo 16.
Suno kay Department of Education Western Visayas information officer Hernani Escullar Jr., nga ro delegasyon hay ginpangunahan ni Dr. Ramir Uytico, regional director it DepEd Region 6 sa ginpatigayon nga parada kaibahan ro mga atleta, coaches, assistant coaches, miyembro it technical working group ag iba pa .
Kaeakip pa kara ro mga superintendents ag assistant superintendents halin sa 21 nga mga schools division offices.
Sa pihak nga parte, uman nga ginpahayag ni Escullar nga target nanda nga iga-uli ro korona makaron nga dag-on pagkatapos nga mabo-oe ro second-place finish ko 2023.
Ro rehiyon nga may kabilugan nga 933 nga delegasyon hay haum nga pagadepensahan ro tatlong bag-ong records nga nahimo ko nagtaliwan nga dag-on, kun sa siin daywa sa swimming ag sambilog sa athletics partikular sa discus throw tanan sa secondary boys.
Ginpahayag dugang nga ko 2023 ro Negros Occidental hay naka-amot it 40 hasta 50% sa kabilugan nga medal count rason nga sa pagbueag it Negros Island Region hay uman sanda nga maga-train it mga mayad nga atleta halin sa Isla it Panay ag Guimaras agud nga mapun-an ro andang pagkaduea.
Nauna eon nga nagbiyahe ro delegasyon halin sa Aklan, Antique, Capiz, Iloilo, ag Guimaras paagto sa Cebu ko gabi-i it Biyernes samtang ro Negros Occidental team hay nagbiyahe ko aga-aga it Domingo agud nga makapahaum sa opening ceremony.
Makaron nga adlaw it Miyerkules hay bilog nga adlaw nga magapahuway ro mga atleta ag magasabak sa pahampang sa Huwebes , Hulyo 11 hasta 15.
Samtang, ginpasiguro man ni Escullar nga 24/7 nga naka-standby ro andang medical team para sa pagtau it insigidang medikal nga atensyon sa mga miyembro it delegasyon nga magakinahangean kara .
