KALIBO, Aklan—Ginpahayag it Department of Tourism (DOT) ro plano karanga himuon nga “Muslim-friendly” ro sikat nga isla it Boracay sa handom nga makaengganyo it mas maabong Muslim nga turista.
Gindeklara ni DOT Secretary Christina Garcia-Frasco ro plano it ahensya para sa sangka “Muslim-friendly Boracay” sa ginpatigayon nga tatlong adlaw nga Salaam: The Halal Travel and Trade Expo ko Hunyo 14.
Suno kay DOT Undersecretary Myra Paz Valderrosa-Abubakar, ro plano nga himuong Muslim-friendly destination ro Boracay hay nabuksan sa meeting it Department of Tourism, mga opisyal it lokal nga gobyerno ag Malay nga naga-host sa sikat nga whiate-sand beach spot ag mga ambassador it Malaysia kamana man Brunei Darussalam, daywang buean eon ro nakataliwan.
Mag-eowas sa nasambit nga proposisyon, ginpahayag ni Frasco nga ro Department of Tourism hay padayon nga nagasuporta sa mga inisyatibo it Bangsamoro Autonomous Region in Muslim Mindanao (BARMM) para i-welcome ro mas maabong Muslim travellers.
Gindayaw man it opisyal ro Quezon City sa pagiging sambilog sa pinaka-Muslim-friendly nga lokal nga gobyerno sa Metro Manila nga may populasyon nga hasta sa 50,000 Muslim kamana man ro pagpatindog it 45 mosque.
