KALIBO, Aklan—Dere-deretso ro pagpahaum it Department of Education ukon DepEd para sa pormal nga pagbukas it klase sa Agosto 22.
Suno kay Dr. Feliciano Buenafe, Jr., schools division superintendent it Department of Education ukon DepEd-Aklan nga ko Agosto 1 hay nag-umpisa ro andang Brigada Eskwela 2022.
Ro Brigada Eskwela suno kana nga kilaea man bilang National Schools Maintenance Week hay ginapatigayon it DepEd kada dag-on agud nga masiguro nga haum ro mga public schools sa pagbukas it klase.
Nagabueuligan suno kana ro mga ginikanan ag mga stakeholders sa paglimpyo ag pagpintura it mga eskwelahan.
Base suno kana sa andang school calendar, pagapasugtan ro mga eskwelahan nga magpatigayon eamang it blended learning schedules ag full-distance learning hasta sa Oktubre 31, 2022.
Umpisa Nobyembre 2, ro tanan nga mga pampubliko ag pribadong eskwelahan hay dapat nga makaangkon it transition period it hasta limang adlaw para sa in-person classes.
Maskin nga owa it masyadong bakasyon, ginpasiguro sigon it mga manugturo nga preparado sanda sa pagbukas it klase makaron nga school year 2022-2023.
