KALIBO, Aklan–Plantsado eon ro deployment plan it Municipal Disaster Risk Reduction and Management Office (MDRRMO)-Kalibo angot sa nagahilapit nga selebrasyon it kapiyestahan ni Sr. San Juan de Bautista.
Suno kay MDRRMO-Kalibo Head Terrence Toriano nga magadeploy sanda it tatlong team sa mga nagapangunang baybayon it banwa partikular eon sa bahin it Lambingan beach, Pook ag Mabilo.
Raya hay sa tunga it ginaeauman nga pagbuhos it mga tawo nga magapatigayun it excursion sa Hunyo 24.
Ginaeauman eon man sigon nanda ro posibilidad nga may paga-respondehan nga pilang insidente eabi eon sa mga nagapaligos sa baybayon.
Ro deployment sigon it andang team hay maga-umpisa it alas-7:00 it agahon hasta alas-5:00 it hapon.
Pagkatapos kara hay magadiretso ro mga nasambit nga MDRRMO personnel sa bahin it Cardinal Sin Avenue ag Osmeña Avenue para sa monitoring it mga daeanon ag vehicular accident.
Mag-euwas kara, may deployment man sigon sanda sa igatukod nga Food Festival sa Martelino Street, Kalibo umpisa Hunyo 21 hasta 23 para i-monitor ro lugar kamana man nga masiguro ro pagsunod it mga pumueoyo sa health and safety protocols.
