Ginpamalibaran ni Department of Foreign Affairs (DFA) Undersecretary Eduardo de Vega ro report nga posibleng makahilway ro mga Pilipinong gin-aresto sa Qatar kun maga-bayad sanda it P1 milyong piyansa, bangud uwa sigon it bail para sa andang kaso.
Suno kay de Vega, ro mga naarestong Pinoy hay posibleng pahilwayon ukon pasakaan it kaso, nga posibleng umabot sa tatlong dag-ong pagkakulong kun padayunon it Qatari government ro legal nga aksyon.
Sa makaron, 17 Pilipino pa ro una sa detention center, samtang tatlong menor de edad eon ro ginpahilway.
Ginsigurado it gobyerno it Pilipinas nga gina-ubra ro tanan nga posibleng tikang para mabuligan ro mga na-arestong Pinoy, kaibahan ro papadaea it mga abogado ag labor attache.
Gin-aresto sanda bangud sa paghiwat it political rally kadungan it ika-80 kaadlawan ni dating Pangueong Rodrigo Duterte, nga presenteng naka-detene sa International Criminal Court.
