KALIBO, Aklan—Nagpaandam ro Diocese of Kalibo sa mga tumueuo kontra sa mga nagapakilaeang pari ag seminarista nga nagapangayo it donasyon.
Suno kay Fr. Tudd Belandres, parish moderator it St. John The Baptist Cathedral nga may nagakalhit sigon nga mga solicitation letters nga nagapangayo it bulig-pinansyal para sa ordinasyon.
Kaeabanan sa mga raya hay naka sotana ag nagapakilaea nga pari ag may kaibahan nga pilang mga ginasugid nga seminarista nga nagalibot sa pilang mga establisimento ag panimaeay sa banwa it Kalibo.
Ginpahayag ni Fr. Tudd nga bukon it konektado ro mga raya sa simbahan partikular sa Diocese of Kalibo bangud nga owa man it may nakipag-coordinate kanda ag sa Senior Obispo Jose Corazon Talaoc sa pihak nga may ginapakita nga certicate of appearance nga gin isyu it LGU Kalibo.
Madumduman nga sangka netizen ro nag post sa social media it litrato it mga naka sotana nga indibidwal nga nakasakay sa tricycle.
Angot kara, nagpadumdum si Fr. Tudd sa mga tumueu-o nga engkaso nga makabaton it solicitation letter, insigidang makipag-angot sa simbahan agud nga masiguro nga matuod ro sueat nga nabaton.
Ginpahayag dugang nga kon may mga proyekto ro simbahan hay gina anunsyo nanda raya pagkatapos it mga misa.
Ginpaathag pa kara nga bukon it maeain nga magbulig sa mga eubus nga nagakinahangean apang dapat nga usisaon anay it mayad agud nga masiguro nga indi mapahamak ro simbahan.
Nauna eon nga nagpaguwa it advisory ro simbahan agud nga paandaman ro tanan.
Ginasugid nga ro nasambit nga mga indibidwal hay taga Mindanao partikular sa Davao City.
