Nakibuylog ro Department of Health sa panawagang maglatag it mas istriktong regulasyon sa mga ginabaligyang aeak sa nasyon.
Ginhimo it ahensiya ro panawagan sa sangka forum nga gintawag nga ‘Alcohol Tax: Itaas’ sa Quezon City kon sa siin nagpanagawan ro mga miyembro kara sa pagpanguna it Sin tax Coalition it mas mataas nga buwis sa mga aeak.
Mag-eowas sa buwis, ginhinyo it grupo ro mas istriktong mga regulasyon sa baligyaan it aeak sa nasyon.
Base sa datos halin sa Global Burden of Disease Health Metrics nga ginpresentar it Department of Health, ro pagkonsumo it alcohol hay natumod bilang nagapangunang risk factor ukon nagserbeng mitsa sa masobra 27,000 mortalities sa bilog nga nasyon.
Bangud kara hay ginpanawagan it ahensiya ro pagbilog it mga polisiyang nakabase sa ebidensiya para solusyunan ro grabeng pagkunsumo it aeak sa Pilipinas.
Kaibahan kara ro implementasyon it public health warning labels kaparehas it ginahimo sa mga pakete it sigarilyo, mas mataas nga presyo it aeak, mas mataas nga excise tax, regulasyon sa distribusyon, ag komprehensibong pagbawae sa pilang alcohol marketing.
Samtang, sa naunang pagtuon sa ginpatigayon it Department of Health ko 2023, nagaguwa nga mabahoe populasyon it mga Filipino adults ro nagapati nga ‘harmless’ ro pagkonsumo it aeak samtang ro iba mat-a hay may manami nga resulta sa ikaayong eawas.
