KALIBO, Aklan—Nakalista ro Department of Labor and Employment (DOLE) Aklan it sangka establisyimento nga permamenteng nagsarado tuga it Covid-19 crisis.
Suno kay DOLE Aklan head Carmela Abellar, ro nasambit nga establisyimento hay may 11 empleyadong apektado.
Mag-eowas kara, 13 mga establisyimento ro nagbawas it mga tawo kon sa siin halin sa kabilugang 1,177 employees hay 310 kanda ro naapektuhan.
Samtang, ro mga establisyimentong nagpatuman it alternative work scheme, nagbawas it work days ukon rotation it workers hay umabot sa numero nga 56.
Sanda hay may kabilugang 1,528 workers kon sa siin kapin sa 1,125 kanda ro apektado.
Ginpaathag ni Abellar nga nakadepende sa magtimbang nga parte kon anu ro arrangement nga pagahimuon bangud sa nasayuran nga pagbagsak it mga negosyo.
May mga employeer sigon nga ginasuhestyon eon lang sa andang mga employees nga mag-usoy it ibang trabaho eabi eon kon sayod nanda nga inde eagi sanda makabangon bangud sa pandemya.
Suno pa kay Abellar, ro andang datos hay hasta ko July 6, 2020 ag sakop eon kara ro tanan nga mga establisyimento sa bilog nga probinsya it Aklan.
