KALIBO, Aklan — Uman nga gin batikos it progresibong grupo sa Aklan ro gina alegar nga “double standard policy” nga gina patuman it Boracay security committee.
Raya hay kasunod it gin post it aktres nga si Alice Dixson sa anang Instagram nga nag-celebrate it anang ika-49 nga kaadlawan sa isla it Boracay sa pihak nga gin pasarado raya sa mga turista it inter agency task force ku Abril 26.
Suno kay Kim Sin Tugna, provincial coordinator it Rise Up-Aklan ag Bagong Alyansang Makabayan (BAYAN)-Aklan nga bukon sigon it patas ro patakaran pag abot sa isyu it mga gina pasugtang makasueod sa Boracay.
Gin akusahan it grupong We Are Boracay, Rise Up Aklan ag Friends of Boracay ro kapulisan matapos nga gin baeabagan nga makasueod sa isla ro 16 nga katawo para sa sangka humanitarian mission ku Hulyo 28.
Samtang, matapos umani it magkaeain-eain nga komento ag pagbatikos sa social media ro aktres, gin eksplikar ni Department of Interior and Local Government (DILG) Undersecretary Epimaco Densing III nga may gin pakita sigon nga identification card nga pirmado it andang punong barangay si Dixson sa security group nga naga pamatuod nga imaw hay residente it Barangay Yapak rason nga gin pasugtang makasueod sa isla.
Gina sugid nga partner ni Dixson ro naga panag iya it sangka high end hotel sa nasambitang lugar.
