KALIBO, Aklan—Nagpatigayon eon it inspection ro pamunuan it Department of Transportation (DOTr) ag Department of Public Works and Highways ukon DPWH angot sa plano nga magbilog it bike lane sa banwa it Kalibo.
Suno kay Punong Barangay Neil Candelario it Poblacion, Kalibo nga magapatigayon it ground breaking para sa expansion active transport infrastructure sa maabot nga Agosto 4 sa Goding Ramos Park.
Kauna unahan sigon ro banwa it Kalibo sa bilog nga Panay nga iga implementar ro proyekto.
Samtang, ginpahayag ni Candelario nga engkaso sigurado nga maapektuhan ro mga establisyimento komersiyal nga dating ginagamit nga parking area ro prente it andang mga baealigyaan bangud sa expansion nga pagahimuon.
Apang magapanipueos ro mga residente ag active transport users.
Tuyo it proyekto nga makatau it eowas nga imprastruktura para sa mga nagabisikleta, commuters ag iba pang nagagamit it karsada.
Sa pihak nga parte, aminado si punong barangay Candelario nga mabudlayan sanda sa pagpatuman it no segregation, no collection policy bangud sa kawad-an it lugar nga pagabutangan it pieilakan it basura ukon material recovery facility ukon MRF.
Dugang pa kara nga may nakataeana sanda nga pondo para sa construction it MRF.
May natumod sigon sanda nga sangka private land sa C Laserna St. Kalibo, apang ginsueatan sanda it DENR nga bawae ro lugar bangud nga masyado raya nga populated ag maeapit sa suba it Akean.
Pila sa andang plano hay magsueod sa sangka loan agreement agud nga magbakae it eugta nga sa guwa it banwa it Kalibo nga paga obrahon nga MRF.
