KALIBO, Aklan — Gin-insister it Department of Public Works and Highways (DPWH)-Aklan nga may bastante nga mga nabutang nga early warning device ag signages sa ginakabig nga accident prone area sa Sitio Bangbang, Brgy. Calizo, Balete.
Suno kay Engr. Joey Ureta, head it maintenance section it DPWH-Aklan nga samtang ginapatigayon ro road construction sa lugar hay nagbutang eagi sanda it nagakaigo nga early warning device ag signages.
Ro pahayag it taeatapan hay kasunod it magkasunod nga aksidente sa lugar nga ginaeakipan it mga trak.
Sa kamatuoran suno kana sa oras nga mabo-oe ro wing van nga nahueog sa banglid ko agahon it Domingo hay paga-umpisahan nanda ro pag-repair it mga nasamad nga guard rail ag iba pang signages sa lugar.
Ginpahayag pa ni Engr. Ureta nga magabutang pa sanda it dugang nga mga panibag-ong signages.
Kada proyekto sigon it DPWH hay may koordinasyon sa kada contractor para sa mga igabutang nga barikada ag signages agud nga malikawan ro mga aksidente.
Nauna eon nga ginhinyu it Balete Municipal Police Station sa natungdang ahensiya it gobyerno nga tutukan ro nasambit nga lugar pinaagi sa pagbutang it mga early warning device nga maeayo pa eamang hay visible sa mga motorista.
Samtang, apela ni Engr. Ureta sa mga motorista nga pirmang magdahan sa pagmaneho ag ugalion nga magtan-aw sa mga traffic signs.
Ro karsada sigon sa nasambit nga lugar hay mag-eowas nga sharp-curve ukon pakurbada hay paubuson pa rason nga kinahangean ro pag-menor sa pagpadaeagan.
Padumdum pa nana nga indi magpadaeagan it madasig eabi eon kon bukon it kabisado ro karsada nga gina agihan.
