KALIBO, Aklan–Indi pa matumod it Department of Public Works and Highways (DPWH)-Aklan kung hin-uno maumpisahan ro konstruksyon it pilang revetment wall nga nakaangkon it kasamaran tuga it mga na-eksperyensyahan nga pagbaha ag kalamidad.
Ginpahayag ni Engr. Joey Ureta, Head it Maintenance Section it DPWH-Aklan nga padayun sanda nga nagahueat it sabat halin sa regional office matapos nga maipasa ro mga nailistang damage assessment report sa imprastraktura.
Kaparte sigon raya it andang pag-request it pondo pinaagi sa Quick Response Fund.
Ginpaathag man ni Engr. Ureta nga ro central office ro naga-schedule kun hin-uno nanda pagabisitahan ro mga reported area.
Nakadepende man sigon sa andang assessment kung maeakip raya sa prayoridad nga mataw-an it pondo rason nga indi eagi mataw-an it alokasyon ro mga ginapasa nga damage report.
Sa pihak nga parte, padayun man ro pagtrabaho it mga ginbilog nga maintenance team it DPWH-Aklan sa national highway nga sakop it Western side.
Presente sigon nga gina-repair it andang mga tawuhan ro mga pothole sa kahabaon it Ibajay ag Nabas.
Dugang pa ni Engr. Ureta nga sangkiri eon lang ro nabilin nga mga buho-buho sa karsada kung siin una eon sanda sa pagpatigayun it finishing.
