KALIBO, Aklan—Magapangatubang sa kasong Reckless Imprudence Resulting to Homicide ro sangka van driver matapos nga maligsa ro motorista nga nagresulta sa anang hinali nga kamatayon sa national highway nga sakop it Brgy. Panayakan, Tangalan.
Una kara, dead on arrival sa Aklan provincial hospital ro driver nga si Herrol Talislis, 31-anyos ag residente it nasambit nga lugar kasunod it naireport nga naaksidente raya sa anang ginamaneho nga motorsiklo.
Apang, sa nagpadayon nga pagpangusisa it Tangalan PNP, may nagguwa nga witness kon siin ginasugid kara nga naligsa ro biktima it van nga ginamaneho ni Ronald Delos Angeles, 36-anyos it Brgy. Old Buswang, Kalibo.
Nadaea pa sa ospital si Talislis apang gindeklara man nga uwa eon it kabuhi it attending physician nga nagtatap kana bangud sa anang fatal nga lastro nga naangkon sa ueo ag iba pang parte it kaeawasan.
