Ginpasiguro it Department of Trade and Industry (DTI) Region 6 nga nagapabilin nga malig-on ro presyo ag bastante ro suplay it mga nagapangunang baeak-eon sa Western Visayas maskin padayon ro pagtaas it presyo it langis tuga it tensyon sa Middle East.
Suno sa DTI, ginpabaskog it andang mga provincial office ro pagbantay sa mga merkado, kaibahan ro mga supermarket ag grocery store, agud masiguro nga nagasunod ro mga retailer sa suggested retail prices (SRP) ag inde makaangkon it kakueangan sa mga produkto.
Dugang pa it DTI-6, ro mga produkto hay regular nga gina-monitor sandig sa Republic Act No. 10623 agud maprotektahan ro mga bumaeakae ag mapabilin nga masarangan ro importanteng baeak-eon.
Gin-engganyo man it ahensiya ro publiko nga magreport sa pinakamaeapit nga taeatapan it DTI kon may mataeopangdan nga sobrang pagtaas it presyo ukon kakueangan it produkto.
Ginlaygayan man ro mga bumaeakae suportahan ro mga lokal nga produkto agud makabulig sa pagpalig-on it ekonomiya it rehiyon sa tunga it pangkalibutanong isyu.
