KALIBO, Aklan — Arestado ro sangka eaeaki nga ginapatihan nga nagaduso it iligal nga droga sa mga estudyante.
Ginkasa ro buy-bust operation sa Sitio Ilaya, Brgy. Bakhaw Norte, Kalibo, Lunes it aga-aga kontra sa suspek nga si John Nalaunan, 23, residente it Roxas Avenue Extension, Brgy. Andagao, Kalibo.
Nabak-ean ro suspek it daywang sachet it ginapatihan nga ginpamaea nga dahon it marijuana kabaylo it P2,000 nga marked money.
Nabo-oe kana sa pag-body search ro sambilog pang sachet it droga ag improvised pipe nga may sueod nga marijuana.
Ginasugid nga ginkanta ro suspek it mga naunang nadakpan nga pusher nga imaw ro source it andang ginabaligya nga marijuana rason nga ginpatigayon ro follow-up operation it mga otoridad.
Makabig sigon raya nga mabahoe nga drug personality sa Aklan bangud nga mag-eowas sa mga drug pusher hay supplier man raya it droga sa mga estudyante sa banwa it Kalibo.
Samtang, nagpanindugan ro suspek nga “planted” ro nabo-oe kana nga marijuana ag kwarta.
