Ninahan ro 38-anyos nga eaeaki matapos nga ginpangbunaean it talibong sa Barangay Aliputos, Numancia, sang gabie it Hulyo 16.
Padayon nga ginausoy it kapulisan ro suspetsado nga nagpaeagyo pagkatapos it insidente.
Suno kay PCapt. Eulogio Pano Jr. it Numancia Municipal Police Station, nabaton nanda ro report bandang alas-7:40 it gabie matapos makabaton it tawag halin sa Barangay Joyao-Joyao nga may natabo nga hacking incident.
Ginkilaea ro biktima nga si Ronel Fuentes, alyas “Nano,” 38 anyos, binata ag residente it Barangay Aliputos, Numancia.
Ginkilala man ro suspetsado nga si Michael Naingue, legal nga edad ag residente man it pareho nga barangay.
Base sa imbestigasyon, nagainom it ro biktima kaibahan ro daywa nana nga kaibahan sa isaea ka baraka kat nag-abot ro suspetsado. Ginpahalin anay it suspetsado ro daywa nga kaibahan it biktima antes gin-atake si Fuentes gamit ro talibong.// Nag-angkon ro biktima it nina sa daywa ka alima ag sa butkon.
Gindaea imaw sa ospital ag padayon nga ginabueong.
Suno sa kapulisan, owa it nina sa eawas ukon ueo ro biktima.
Sa inisyal nga imbestigasyon, nagpahayag ro biktima nga owa sanda it sayod nga rason kon haman gin-atake sanda it suspetsado.
Pareho man sanda nga residente it Barangay Aliputos, apang suno sa kapulisan, owa it direktang rekord nga may naging away sa tunga nanda.
Padayon nga gausoy ro tracker team it Numancia MPS sa suspetsado nga sa makaron hay padayon nga nagapanago ag at-large.
Ginapanawagan it kapulisan ro suspetsado ag ro andang pamilya nga magsurender agud mabatian man ro andang bahin, samtang ginapangabay man sa publiko nga magtao it impormasyon sa pinakamaeaput nga estasyon it pulis kon may nasayuran parte sa ginausoy nga suspetsado.
