BALITANG Espesyal —- Nag-viral sa social media websites kan-o eamang ro istorya it sangka 60-anyos nga eaeaki sa China matapos ipakita sa sangka documentary ro anang kabuhi bilang squatter sa Beijing Airport!
Umpisa pa ko 2008, naga-istar eon si Wei Jianguo sa Beijing Airport.
Buhi pa ro anang pamilya ag may kaugalingon sanda nga baeay apang mas ginpili ni Wei nga sa airport eon lang mag-istar.
Kat 46-anyos si Wei, napahalin imaw sa anang trabaho ag nakaangkon it depression.
Ro pag-inom it aeak ag pagpanigarilyo r naging pamaagi nana agud nga makalipatan ro problema.
Kat eubusan eon nga naging alcoholic si Wei, gintinguhaan imaw nga papunduhon it anang pamilya .
Bangud nga sa tan-aw ni Wei hay owa eon imaw it kahilwayan sa kaugalingon nana nga baeay, naisipan nana nga maglayas ag mag istar eon lang sa Beijing Airport.
Daea ro sangka electric cooker, haboe ag pilang damit, nag abot it masobra sa sang dekada ro pag-istar ni Wei sa airport.
Suno kana, state-of-the-art ro mga pasilidad sa Beijing Airport rason nga owa imaw nakaangkon it problem sa pag-istar kara.
Sa sueod it 14 anyos, pilang beses eon imaw nga ginapa-uli it mga pulis ag ginbalik sa anang pamilya apang owa man it hugut nga laye nga nagabawae nga magbuhay sa airport rason nga nagabalik man si Wei idtu.
Sa makaron, owa pa it planong maghalin si Wei sa Beijing Airport ag naga abot eon sa 5,198 days ro ginbuhay it anang pag istar kara.
