KALIBO, Aklan—Gin-umpisahan makaron nga adlaw it Commission on Elections ukon Comelec Kalibo ro andang daywang adlaw nga Election Registration Board ukon ERB hearing kaina nga agahon hasta hin-aga nga adlaw it Martes, Oktubre 15.
Suno kay Atty. Christian Itulid, Kalibo Comelec election officer IV nga iga-evaluate nanda ro tanan nga mga dokumento nga ginsumite it mga bag-ong registrants nga naghingabot antes nga natapos ro deadline it Voter’s Registration ko Setyembre 30.
Ginpahayag nga may kabilugan sanda nga 2,319 nga pending applications nga subject sa ERB hearing.
Bangud nga masobra sa daywang libo ro nasambit nga numero, daywang adlaw ro andang gintaeana para kara.
Mag-eowas sa pending applications it mga bag-ong registrants, nakalista man sanda it 1,045 nga transferee.
Ro ERB board hay ginaeakipan it comelec officer bilang chairman ag ro mga miyembro hay ro DepEd Aklan supervisor ag head it civil registrar office.
Hasta sa makaron hay owa man sigon it may nagdihon it andang oposisyon angot sa mga pending applicants ag transferee.
Ginpasiguro man ni Atty. Itulid nga iga-post nanda sa masunod ro resulta it gin patigayon nga ERB hearing.
