KALIBO, Aklan—Nakataeana eon nga iga-eubong sa mayo 14, martes nga adlaw si Jan Andrei Bolido, ro empleyado it sangka cargo forwarding company nga gin-hold-up ag ginbaril patay it anang mga katrabaho samtang nakataeana kunta nga maga-deposito it kwarta sa sangka money remittance center .
Ro insidente hay natabu sa guwa it andang opisina sa Brgy. Dumga, Makato ko nagtaliwan nga Abril 27.
Napamatud-an it mga awtoridad nga inside job ro natabu matapos nga nag-aku eon sa krimen ro gunman nga si Delsol Zonio, Jr., 35- anyos ag residente it Barangay Polo, Banga.
Padayun pa ro pagtugis sa anang kakunchaba nga ginasugid nga empleyado man it J&T Express Philippines .
Nagatuhaw nga kabisado it mga suspek ro daily routine it kompaniya partikular ro pag-deposito it mabahoe nga kantidad it kwarta halin sa andang opisina paagto sa sangka money remittance center .
Ro bangkay ni Bolido hay presenteng nakahamyang sa baeay it anang ina sa Barangay Tamalagon, Tangalan.
Ro biktima hay ginbaril nga tinamaan sa anang tiyan matapos nga makipag-agawan sa mga suspek sa anang daea nga inugdeposito nga kwarta.
Madumduman nga ro 35-anyos nga si Zonio hay nauna eon nga nagpaeagas sa kapulisan matapos nga magpaeagiw kat parahan sa checkpoint sa Barangay Venturanza, Banga, gabi-i it Lunes, Abril 29.
Narekober ro saeakyan sa tago nga lugar maeapit sa kilid it suba sa Barangay Balactasan sa banwa it Madalag.
Naaresto si Zonio kat gin-balikan ro anang gin-abandonang kotse pagka-aga it Martes kaibahan ro anang amigo agud kunta nga boe-on ro saeakyan .
Mag-eowas sa posibleng paga-atubangon nga robbery with homicide, patong patong nga kaso pa ro igapasaka kontra kana partikular ro reckless driving, ag resistance and disobedience to an agent of a person in authority sa Banga PNP ag pag-eabag sa Republic Act 9165 ukon Comprehensive Dangerous Drugs Act of 2002 sa Madalag PNP matapos nga makita sa sueod it anang kotse ag bag ro an-um nga sachet it ginadudahan nga shabu, ,mga drug paraphernalia, cash nga masobra sa P23,500 ag nagkaeain-eain nga IDs nga nakapangaean kana kaibahan ro ID nana bilang empleyado it J&T Express.
