KALIBO, Aklan—Patay ro empleyado it sangka delivery express kat barilon it owa nakilaea nga eaeaki samtang nagapasakay it andang service truck sa atubang it andang opisina sa Brgy. Dumga, Makato, agahon it Sabado, Abril 27.
Nakilaea ro biktima kay Jan Andrei Bolido, 24 anyos, residente it Brgy. Tamalagon, Tangalan ag nagatrabaho bilang quality assurance it J&T Express samtang ginatumod pa ro pagkatawo it nagpaeagiw nga mga suspek nga armado it owa pa nasayuran nga kalibre it baril.
Base sa report, pasado alas-8:20 it agahon kat matabu ro insidente sa atubang mismo it sangka branch it andang kompaniya sa nasambit nga lugar, kun sa siin samtang nagapaguwa sa opisina pagkatapos it andang meeting ag nagapasakay eon kunta sa andang service truck kat paeapitan it sangka suspek nga nakasuksok it full-faced helmet ag ginbaril nga tinamaan sa anang kilid.
Kasunod kara hay ginhabnit ro anang daea nga kwarta nga nakabutang sa sangka plastic nga gina-alegar nga nagabalor it P500,000.
Ginpahayag dugang nga ro nasambit nga kantidad hay iga-deposito kunta sa sangka money transfer, kun sa siin haeos P200,000 ro natigayon nga mabo-oe it suspek matapos nga magisi ro plastic ag magkalhit ro iba pang kwarta nga may nagkaeain-eain nga denomination sa karsada.
Antes ro krimen hay nagpangutana pa sigon ro suspek sa pilang empleyado it kompaniya kon anong oras nagabukas ro kaiping nga TV repair shop hasta nga nataeupangdan ro pagguwa it biktima ag raya hay ginsundan.
Gintinguhaan pa sigon nga maeagas it biktima ro suspek matapos nga maagaw ro kwarta, apang natumba eon raya bangud sa anang lastro.
Nadaea pa ro biktima sa Aklan Provincial Hospital, apang patay eon kat maka-abot.
Matapos ro pagbaril hay nagpaeagiw ro suspek sakay it get-away vehicle nga kulay blue nga Rouser nga motorsiklo nga nagahueat sa unahan daea ro gingamit nga baril, apang naaywan ro anang hoster sa crime scene.
Ginasugid nga paagto ro mga raya sa direksyon pa-Kalibo.
Ginapatihan nga mabuhay eon nga gin-surveillance it mga suspek ro routine it biktima antes nga ginkasa ro operasyon.
Nagapatigayon eon it pag-review sa Closed Circuit Television (CCTV) sa lugar para sa posibleng pagkilaea sa mga suspek kamana man ro pagpangutana it mga awtoridad sa mga katrabaho ag residente nga nakasaksi sa krimen.
Nagapadayun man ro imbestigasyon it Makato Municipal Police Station sa insidente.
