KALIBO, Aklan—Nagdihon it motion for reconsideration ro Aeta community sa isla it Boracay agud nga sabton ro notice nga ginpadaea kanda it Department of Agrarian Reform ukon DAR angot sa protesta it claimants nga sangka land developer sa eogta nga gin-award kanda ni dating presidente Rodrigo Duterte sa idaeom it Comprehensive Agrarian Reform Program ukon CARP.
Suno sa andang legal counsel nga si Atty. Daniel Dinopol, ro porsyon it eogta nga napasaalima sa mga katutubong Aeta hay na-classify bilang alienable and disposable land.
Apang, igakwestyon nanda raya sa natungdan nga ahensya it gobyerno ro naging basehan sa pag-grant it protesta it claimant nga sangka land developer kon sa siin ginapahayag nga bukon it suitable ro eogta pang agrikultura.
Ginklaro ni Atty. Dinopol nga bukon it suitable for rice and corn farming ro eogta apang ginapanipuslan makaron it mga tumandok ro lugar sa pagpananom it nagkaeain-eain nga root crops, tinuean-on ag maabong iba pa kon sa siin ro nasambit nga mga produkto hay ginabaligya nanda sa mga hotels and resorts sa isla.
Ginpaathag dugang ni Atty. Dinopol nga ro nasambit nga protesta it claimant hay paunang tikang para sa handom nanda nga kanselasyon it Certificate of Land Ownership Award ukon CLOA.
Sa oras sigon nga dumaeagan ro proseso ag inde nanda raya masuk-ean hay may posibilidad nga mabutang sa aeang-aeang ro ilistaran it mga tumandok.
Angot kara, haom sanda ag iba pang organisasyon nga magbulig sa Aeta community agud nga inde mabuoe ro eogta nga anda eon makaron nga ginapanag-iyahan.
