KALIBO, Aklan—Eowas nga naka-uli sa baeay it anang tiya ro sangka 22-anyos nga daeaga makaron nga adlaw it Martes matapos raya nga gin-report nga naduea ko Setyembre 17.
Suno kay Edna Molin, ina it daeagang si Jhanneth Molin, residente it Brgy. Ugsod, Banga nga mabahoe ro anang pagpasaeamat sa Bombo Radyo sa madasig nga pagkakita it anang unga.
Haeos pilang adlaw sigon sanda nga nagakabaeaka bangud sa mga napabalita makaron nga pagkaduea it mga kababayin-an nga gina-alegar nga ginabo-oe it puti nga van.
Nasayuran nga ginhatud it mga pulis ro daeaga sa baeay it anang tiya sa barangay Poblacion, Banga.
Adlaw it Sabado sigon kat mag-ea-ong ro andang unga nga magasueod sa trabaho apang makataliwan ro tatlong adlaw hay owa raya naka-uli rason it andang eubus nga pagkahawag.
Dugang pa nga indi nanda raya ma-contact bangud nga ginpang-block ro bilog nga miyembro it pamilya sa messenger ag indi man matawagan sa anang cellphone.
