KALIBO, Aklan—Nag abot sa 1,258 nga indibidwal ukon 354 nga pamilya ro numero it mga evacuees sa banwa it Numancia.
Raya ro ginpahayag ni Municipal Disaster Risk Reduction and Management Officer Arvin Tolentino bangud sa bagyong Paeng.
Raya hay sa pihak nga owa pa tumama sa kaeugtaan ro bagyo kahapon ag ro naexperiensiyahan nga mga pag-uean hay tuga it shearline ag trough it bagyo.
Suno kay Tolentino nga masyadong madaeum ro baha kapin sa Bulwang ag parte it Olive Plains kun sa siin pila sa mga residente hay nakaexperiensiya it eampas tawo nga baha.
Sa pihak kara, ginklaru it MDRRMO nga alas-11:00 pa eamang it agahon hay nag-abiso eon sanda it pre-emptive evacuation apang naging kampante sigon ro mga pumueuyu ag owa eagi nag sunod.
Sa kamatuoran pa suno kana nga pasado alas-9:00 it agahon hay nagpaguwa eon it suspension of classes si mayor Jeserel Templonuevo.
Bandang alas-8:00 eon it gabi-i naka-sueod ro andang mga rescuers sa mga na-stranded nga residente matapos nga mag-eapaw ro Aklan river tuga it high tide.
Haeos tanan nga barangay sa Numancia hay apektado mag-eowas sa Joyao-Joyao ag Tabangka nga nagdeklara eon it zero damages.
Sa makaron pila sa mga nagbakwit hay nagapabilin sa mga evacuation center.
Sa pihak nga parte, nagapadayun pa ro andang assessment sa mga kahalitan nga gintuga it bagyo partikular sa agrikultura ag imprastraktura.
