KALIBO, Aklan — Ginatugis eon it kapulisan ro sangka rider nga gina-alegar nga nagpakita it anang kinatawo sa atubang it daywang ka babaye sa magkaseparado nga insidente, Martes nga adlaw, Agosto 20.
Sa panaysayon it 42 anyos nga babaye, sangka single parent ag tumandok it Brgy. Cajilo, Makato nga samtang nakatalikod sa pwertahan it andang baeay hay may sangka owa nakilaea nga eaeaki nga nakasakay sa motorsiklo ro gulping nagliko sa anang prente.
Sa anang pagtueok hay gulpi sigon nga ginpaguwa it suspek ro anang “barangay chairman” nga eubus nana nga ginkakibot.
Samtang gina-obra ro nasambit nga kabastusan hay nagabuyot ro sambilog nga alima it suspek sa anang cellphone.
Insigida nga gin-report it biktima ro insidente sa Makato Municipal Police Station.
Sa makaron hay padayun nga gina-imbestigahan ro insidente partikular ro pagtumod sa pagkatawo it suspek.
Sa pihak nga parte, bandang alas-9:00 gabi-i it Martes hay gina-alegar nga sangka babaye man sa Barangay Tabangka, Numancia ro ginpakitaan man it kinatawo it sangka owa nakilaea nga eaeaki.
Base sa description it biktima, ro eaeaki hay nakasakay man sa motorsiklo ag kaanggid ro itsura sa nagpangbiktima man sa sangka babaye sa banwa it Makato.
Angot kara, nagpanawagan ro mga awtoridad sa iba pang naging biktima nga magpasaka it reklamo ag dapat nga maging alerto ro tanan agud nga maprotektahan ro mga kababayen-an eabi eon ro mga estudyante nga pamatan-on.
