KALIBO, Aklan—Ginpaathag ni Metro Kalibo Water District acting general manager Engr. Lydio Ureta nga ro nabaton nga bill sa tubi it mga konsumidor hay ro para sa buean it Abril hasta it Mayo.
Raya ro rason kon ham-an it may nakit-an nga pagtaas sa anda nga konsumo.
Mag-eowas kara, inde sigon pagkahangawaan ro extended due date nga nakabutang sa anda nga water bill kaparehas it 2030 ukon 2040 bangud raya ro tikang it taeatapan agud mapasayod sa mga konsumidor nga ginduea nanda ro penalidad sa baeayran sa mga natungdan nga buean bangud nga ginpaidaeom sa enhanced community quarantine ro bilog nga probinsya it Aklan tuga it Covid-19 pandemic.
Sa may mga reklamo ukon kutana hay bukas sigon ro andang opisina ag pwedeng mag-adto ro mga konsumidor sa taeatapan during office hours.
Samtang sa pihak nga parte, sa anang pagdumaea sa MKWD hay anda sigon nga ginatutukan makaron ro pila ka mga reklamo kaparehas sa maeobog nga tubi nga naeekperyensyahan sa pila ka mga banwa kamana man ro kawad-an it nagakaigong supply it tubi paadto sa banwa it Balete.
