Ginkumpirma it FIFA nga ro koponan nga magadaog sa 2026 FIFA World Cup makabaton it championship rings mag-eowas pa sa tradisyonal nga tropeyo ag medalya.
Raya ro kauna-unahan nga kahigayunan sa kasaysayan it World Cup nga magatau ro FIFA it championship rings sa mga mangin kampeon.
Maga-atubang ro Argentina ag Spain sa grand finals sa MetLife Stadium sa East Rutherford, New Jersey.
Suno sa FIFA, ro bag-o nga pagkilaea hay may tinutuyo nga himuon bilang tradisyon para sa professional sports league sa Amerika.
Sa kabilugan, 2,026 nga mga championship rings ro paga-obrahon.
Kapin sa 30 kara ro para sa magadaog nga koponan, samtang ro nabilin nga 1,996 hay igabaligya sa mga fans.
Pagkatapos it final, ro captain ag head coach it magadaog nga koponan makabaton it temporaryo nga championship rings.
Ro sangka parte it singsing maga-repressentar sa FIFA World Cup Trophy, samtang ro pihak nga parte hay iga-disenyo para sa identity it magadaog nga koponan.
Ginaeauman it Argentina nga madepensahan nanda ro andang titulo ag mangin kauna-unahan nga men’s national team nga nagkampeon sa magkasunod nga World Cup umpisa pa ko 1962.
Sa pihak nga parte, ginatinguhaan man it Spain nga mabaton ro andang ikaywa nga World Cup title ag una nga kampeonato umpisa ko 2010.
Ro final it 2026 FIFA World Cup nakataeana sa Hulyo 20, alas-3:00 sa agahon oras sa Pilipinas sa MetLife Stadium sa East Rutherford, New Jersey.
